Pangumbaraan

Blog nu teu kagarap

Asep Hermawan — Thu, 09 Dec 2010 09:22:25 +0000

Kumaha atuh ieu teu? Gaduh blog tapi kosong wae.Wilujeng kanu masih konsisten nuliskeun ide-idena dina blog.

Lebaran di Pasisian Kaltim

Asep Hermawan — Mon, 21 Sep 2009 07:27:52 +0000

Taun ieu mah kuring teu ngalaman hesena mudik kawas kalolobaan dulur-dulur nu ngalumbara jauh ti lemburna sewang-sewangan. Memang kuring mah moal disebut ngumbara, sabab dua minggu sakali bisa mulang ka lembur matuh. Geus sababaraha taun kuring lebaran parengan keur di lokasi, nyaeta tempat kuring nyiar kipayah ayeuna di wewengkon Muara Badak, Kabupaten Kutai Kartanegara – Kalimantan Timur.
Lebaran taun ieu perusahaan mere kalonggaran ka kuring sabatur-batur di pagawean keur shalat ied tur silaturahmi. kaitung 6 jam rig standby keur mere kasempetan kaum muslimin lebaran. Atuh tumaninah pisan kuring shalat ied di rig tatangga nu kabeneran ngayakeun sholat ied. Sanajan jauh ti pilemburan, dulur-dulur kuring di rig-5 satekah polah ngayakeun sholat ied, nepi ka imamna ge manggil ti Muara Badak. Sanggeus sholat ied, terus sasalaman jeung balakecrakan nuang kupat lebaran. Malahan kru lokal mah sempet mulang ka imahna keur silaturahmi jeung kulawargana masing-masing.

Sanajan jauh ti imah ge kuring ngarasa syukur sabab bisa lebaran cara batur nu di lalembur. Sanajan jadwal kuring mah saminggu tas lebaran karek bisa mulang. Nya kakaren mah meureun tos moal kabagean, tapi tetep aya hiji kabagjaan bisa mulang ka lembur.

Foto-fotona mah aya di http://asepher.tumblr.com

Riung Mungpulung Alumni’97 Smansa

Asep Hermawan — Sun, 09 Aug 2009 04:35:40 +0000

Sanggeus 12 taun papisah, alumni SMA Negeri 1 Subang taun 1997 ngayakeun riung mungpulung keur ngaraketkeun deui tali silaturahmi. Ieu acara nu diayakeun tanggal 19 Juli 2009 di Dayang Sumbi Hall -Sari Ater teh dihadiran ku ampir 50 alumni kalayan kulawargana. Salian ti acara tepang sono, ngobrol ngaler ngidul oge diselangan ku musik jeung undian doorprize. Foto-fotona diunggah di alumnismansa.org jeung facebook angkatan’97.

Reuni Alumni’97 Smansa Subang

Asep Hermawan — Sun, 28 Jun 2009 01:49:13 +0000

Reuni alumni’97 (lulusan’97) Smansa Subang bakal diayakeun tanggal 19 Juli 2009. Tempat nu dipilih nyaeta tempat wisata Sari Ater. Info nu leuwih lengkep mangga titenan di facebook.

Hayu urang karumpul…nu munggaran sanggeus 12 taun urang papisah…

Jepretan Amatir: Subang Pakidulan

Asep Hermawan — Thu, 29 Jan 2009 00:46:56 +0000

Foto daerah Ciater di pakidulan Subang, dipotret di tempat nu disebut Dayang Sumbi. Hejona kebon enteh satungtung deuleu jeung gunung-gunung antara Jalan Cagak nepi ka Gunung Tangkuban Parahu jadi daya tarik utama daerah ieu.
Loba jalma ti luar daerah lamun ngadenge Subang teh dianggapna daerah pagunungan. Padahal mah Subang boga wilayah ti mimiti pagunungan nepi ka basisir laut jawa.

Ahad Isuk-isuk…

Asep Hermawan — Tue, 23 Dec 2008 00:37:03 +0000

Ci ibun masih nyalangkrung dina tungtung daun, kota Subang poe eta rada alum ku mendung. Rebun-rebun kuring sakulawarga geus ngabring ka GOR Subang, maksud rek jalan-jalan bari mumuluk di pasar kaget nu saban poe ahad minuhan jalan jeung palataran GOR. Kira-kira 11 taun kuring teu pernah ngulampreng ka eta tempat, katingalina GOR teh geus teu kaurus. Baheula mah waktu SMA, kadang didinya diayakeun tunamen maen bal antar sakola. Di pasar kaget eta, rupa-rupa barang jeung kadaharan di jual. Ti mimiti tukang bubur, kupat tahu, wuduk, rupa-rupa inuman, buah-buahan, pakean, coco’oan budak nepi ka tukang manuk jeung kelenci. Salian ti nu olahraga, lolobana nu daratang ngan saukur jalan-jalan atawa balanja. Nya kaasup kulawarga kuring nu niatna ukur wisata kuliner…

Dua anak kuring ngaeh hayang dipangmeulikeun manuk piit. “Mangga, tapi engke kedah dileupaskeun deui nya” ceuk kuring. Mudah-mudahan anaking…, aranjeun daek mikanyaah kana sasatoan ku jalan teu ngurung maranehna.

Di lapangan, si cikal jeung si bungsu kacida gumbirana lulumpatan dina amparan jukut. Sakalian kuring oge masang tenda Coleman dihandapeun tangkal caringin keur tempat reureuh barudak. Poe ieu kuring hayang hayang suka bungah jeung kulawarga, sabab engke sore maranehna bakal ditinggalkeun deui nyiar kipayah ka tanah sebrang…..

Nulis blog nganggo ScribeFire

Asep Hermawan — Tue, 28 Oct 2008 11:07:53 +0000

Khusus ka nu nganggo web browser Firefox, aya add-on khusus kanggo nulis blog, namina ScribeFire Blog Editor. Ieu add-on tiasa diunduh langsung di situsna Mozilla https://addons.mozilla.org/en-US/firefox/addon/1730. Saparantos diinstall, ScribeFire tiasa diaktifkeun ku jalan nge-klik gambar buku note koneng di pojok handap palih kenca atanapi Tool>ScribeFire. Sateuacanna urang kedah nyetting hela ScribeFire supaya nyambung jeung blog urang. ScribeFire tiasa ngadukung langkung ti 15 layanan blog hosting. Urusan nge-post atanapi ngedit tulisan, nganggo ScribeFire jadi leuwih gampang tibatan urang kudu login kana blog dashboard. Nu jelas dukungan multi-account langkung ngagampangkeun lamun urang ngagunakeun sababaraha blog. Kanggo panduanna tiasa buka ieu situs.